O Consello da Xerencia de Urbanismo dará luz verde a próxima semana á memoria xustificativa, bases reguladoras e expediente do concurso de proxectos con intervención de xurado para a construción de edificación dotacional e vivendas de protección pública en Barreiro que ten un orzamento de 868.160 euros.
O alcalde informou do procedemento este venres en rolda de prensa engadindo que o proxecto municipal contempla a construción de 54 vivendas de promoción pública, un auditorio, un centro cívico e lugar de encontro nesa zona de Lavadores que terá un importe global de 20 millóns de euros.
O obxecto do contrato que será aprobado o vindeiro martes na Xerencia de Urbanismo comprende a redacción do proxecto básico e de execución de todas as actuacións e a dirección facultativa das obras cun orzamento de 868.160 euros. O concurso, aberto e anónimo, concederá un premio de 30.000 euros á proposta gañadora, 20.000 euros para o segundo premio, 10.000 para o terceiro e dous accésits de 5.000 euros cada un.
O proxecto de urbanización aprobado propón unha edificación aberta cunha zona verde central nunha superficie de 2.500 metros cadrados cunha superficie edificada máxima de 12.500 metros cadrados. Tal e como explicou o alcalde, o auditorio deberá ter unha capacidade mínima para 340 prazas e o edificio residencial deberá acoller 54 vivendas, contemplando un maior número de prazas de aparcamento.
- Te recomendamos -
