“En Vigo temos que estar moi por diante dos demais en todo o relacionado coa transformación dixital das pequenas e medianas empresas e, igual que na proxección mundial do Nadal, temos que ser líderes neste proceso porque a cidade é economía”. É a mensaxe central que dirixiu este xoves o alcalde aos directivos das pemes que participarán no programa “Vigo Dixital Pemes”, e que será impartido polo Centro de Estudos Universitarios Superiores de Galicia, polo que recibirán de forma gratuíta 140 horas de formación, que están valoradas en 14.000 euros. O programa está financiado cos fondos europeos Next Generation EU do Goberno de España.
Abel Caballero, tras poñer en valor a nova iniciativa impulsada polo Ministerio de Economía, financiada con fondos europeos Next Generation, para proxectar a dixitalización das empresas, aumentar a súa competitividade e afrontar con éxito a competencia, explicou que o programa “Vigo Dixital Pemes” será impartido por expertos do Centro de Estudos Universitarios Superiores de Galicia, Cesuga, a empresas dos sectores da hostalería, a xestión, e industria, entre outros.
O rexedor sinalou que a formación, que arrincará o próximo 16 de febreiro, contará cunha duración de 140 horas e con módulos formativos sobre o plan de transformación dixital, a nova relación cos clientes, os procesos analíticos, de automatización e de seguridade, entre outros.
Caballero incidiu ante os directivos na transcendencia que representa para as pemes de afrontar a renovación e transformación dixital.
- Te recomendamos -
