O goberno local sumouse á celebración do Día Mundial dos humedais con dúas actividades didácticas e percorridos medioambientais. Hoxe foi a quenda escolar, cunha visita ao humedal da Bouza, mentres que o próximo domingo 5 está previsto un acto familiar con actividades para todas as idades cun roteiro ecolóxico e xogos lúdicos.
O alcalde achegouse esta mañá á Bouza onde estudantes de Primara dos colexios Seis do Nadal e do Illas Cíes realizaron unha visita co obxectivo de recibir información sobre os valores medioambientais dos humidais e a importancia que teñen para preservar a biodiversidade.
Como todos os anos, o Concello de Vigo secundou a campaña de sensibilización da Convención de Ramsar da Unesco a prol das zonas húmidas de todo o planeta, que neste ano ten o lema “Pola restauración dos humidais”.
Tal e como detallou, no termo municipal de Vigo cóntase cunha extensión de humedais que alcanza os 314.000 m2, “gran riqueza ecolóxica”, destacando en augas doces A Bouza, Goberna, Muíños, O Bao, Fontes-Pertegueiras e Barreiro e, en augas salobres, a Xunqueira do Lagares.
Nesta edición 2023 tamén está previsto realizar un evento familiar. Terá lugar o domingo 5 de febreiro. Un percorrido polos humidais do Río Lagares e A Bouza. A convocatoria será ás 09,30 h na Bouza desde onde se trasladará gratuitamente aos asistentes en autobús ata a Xunqueira do Lagares. Ás 10,30h comezará un percorrido interpretado polos humedais do Lagares e A Bouza e ás 11,00 h están previstos xogos medioambientais e lúdicos. A inscrición estará aberta no 010 ata mañá venres, 3 de febreiro.
- Te recomendamos -
