O alcalde convida á cidade a asistir á VI Gala Solidaria Bicos de Papel

O alcalde participou este martes na presentación da VI Gala Solidaria Bicos de Papel que se desenvolverá este domingo, 23 de abril entre as 17 e as 20 horas, no Auditorio Mar de Vigo, xunto a Milagros Martínez, presidenta da entidade e Natalia Dieste, directora.

Abel Caballero felicitouna polo “traballo excepcional, único que facedes. Sodes un exemplo na forma de actuar. Vós dádeslle marca de carácter a Vigo” polo labor de apoio que desenvolve Bicos de Papel coas nenas e nenos que padecen cancro e coas súas familias. “Dígolle á cidade que esteamos alí, ás 5 da tarde no Auditorio Mar de Vigo”, apuntou o rexedor convidando á cidadanía viguesa a sumarse a este evento solidario.

Natalia Dieste, directora de Bicos de Papel, agradeceu o apoio do Concello e emprazou a todo o mundo á gala solidaria: “queremos que todo o mundo goce do evento” previsto para as cinco da tarde pero desde as catro horas haberá actividades no hall con pintacaras, chapas e xogos diversos.

Con Óscar Martínez como mestre de cerimonias e coas nenas e nenos da asociación nas tarefas de presentación, a gala contará coas actuacións de Ollo Piollo, a actriz Carmen Ruiz, o Mago Rey Midas, a música de Visions of Johana e o teatro de Jamming.

As entradas para asistir á gala poden adquirirse en www.migranodearena.org e a recadación de fondos será destinada ao programa de apoio sociopedagógico de Bicos de Papel.