O alcalde felicitou esta mañá á aerolínea Binter na celebración do quinto aniversario da súa conexión entre Vigo e Canarias. “Desde o principio pareceunos moi importante que Binter elixise Vigo como primeiro destino nacional fose das illas e realmente foi a crónica dun éxito anunciado”, asegurou o rexedor.
“É unha enorme satisfacción atoparme con tantos cidadáns canarios en nosas cales grazas á ponte aérea que Binter realiza entre Vigo e Tenerife e Gran Canaria”, afirmou Caballero, á vez que lembrou o irmandamento da cidade olívica coas Palmas, que “fai que a conexión entre nós sexa máis especial”.
O rexedor destacou que Binter voa a Vigo sen ningún tipo de axuda económica por parte do Concello e con “magníficos avións”. “Está demostrado que cando hai tirón non é necesario poñer axudas, pero noutros casos vémonos obrigados a facelo porque a Xunta apoia os voos desde Santiago e temos que entrar nesa competencia”, afirmou.
Pola súa banda, o director Comercial e de Márketing de Binter, Miguel Ángel Suárez, destacou os 185.000 pasaxeiros que voaron de forma directa entre Vigo e Canarias durante estes cinco anos. “O ano pasado voaron 62.000 persoas, o que a converte no roteiro con maior volume de viaxeiros de Binter no exterior”, asegurou, á vez que engadiu que teñen previsións de crecemento.
Vigo é o único destino da rede con voos todos os días da semana, catro a Gran Canaria e tres a Tenerife. Ademais, os pasaxeiros poden realizar de maneira gratuíta conexións co resto das illas. “O pasaxeiro deste roteiro é moi variado, desde os que veñen por lecer a gozar de Vigo, a súa gastronomía e todo o que ofrece, ata outros moitos que o fan por ter familia na cidade e tamén por motivos de traballo”, engadiu Suárez.
- Te recomendamos -
